Seven Sisters’ Cultural Meet neih a ni

Hmarchhak state pariatte inkara inpawhna ṭha zawk a awm theih nan nimin khan Tribal Research Institute, Kelsihah Seven Sisters’ Cultural Meet huaihawt a ni a, Art & Culture minister C Lalsawivunga'n a hawng.

Cultural Meet hi Ministry of Tribal Affairs bultuma buatsaih a ni a, thupui chu 'Unity in diversity: The Northeast symphony’ tih a ni. Seven Sisters tih ni mah se, India hmarchhak state pariat - Arunachal Pradesh, Assam, Manipur, Meghalaya, Mizoram, Nagaland, Tripura leh Sikkim aiawhte'n an hnam lâm pakhat ṭheuh an entir a; vawiin hian Falkawna Living Museum (Zokhua)-ah hman chhunzawm a ni ang.

Art & Culture Minister chuan, Meet buatsaih chhan ber chu, culture hmanga inpumkhatna a awm theih nan a nih thu sawiin, "Mipui inpumkhatna atana hmanraw pawimawh berte zinga mi a ni a, hnam lâm leh incheinate hi lâm leh incheina satliah mai ni loin, kan history, kan rinna, kan tawnhriat leh a hnam anga kan nihna tarlanna a ni," a ti a; Meet hmanga inpumkhatna ṭha zawk nei ṭheuh turin kal khawmte a chah.

Hmarchhak state-te chu India rama hnam ziarâng, inchei dan, rimawi, ṭawng leh hmun dangdai ber berte awmna a nih thu C Lalsawivunga chuan sawi a, "Kan hnam nunphung danglam tak takte hi kan inkara inpawhna ṭha siamtu a ni a, kan danglamnate hi inhmuh thiam lohna atan hmang loin, kan chakna lian ber atan kan siam zawk tur a ni," a ti.

Seven Sisters’ Cultural Meet hawnna inkhawmah hian Art & Culture secretary Zodingpuii'n inlawmna thu a sawi a ni.