College zirtitute'n inkhawmpui an hmang

Mizoram College Teachers’ Association (MCTA) chuan nimin khan BSI Hall-ah Annual General Conference vawi 47-na an hmang a, Higher & Technical Education minister Dr Vanlal-thlana'n a hmanpui.

MCTA Annual Conference hi session hniha ṭhen a ni a, session khatna hi Minister hoa hman niin, session hnihnaah ro an rel. MCTA-ah hian Mizorama college hrang hrang 24-ah member 650 vel a an awm mek a ni.

HTE Minister chuan, sorkar laipuia Ministry of Education-in All India Survey on Higher Education Report-ah Mizorama zirna-in sangah zirlai inziak lut an ṭhat hle laiin, National Institutional Framework (NIRF) 2025 ranking tihchhuahah sorkar college-te an dinhmun a ṭha tawk lo a, ṭan lak a ngaih thu a sawi.

Zirlaite leh zirtirtute'n hma an sawn theih nan Google AI Education Series hnuaiah Google AI Lead team-te nen thawkho tura hmalak mek a nih thu sawiin Dr Vanlalthlana chuan, "Sorkar laipuiin kum 2027 aṭanga NEET leh SMATEE Online-a exam a kalpui turah college hrang hrangah Computer Based Test Centre kan neih theih nan hmalak mek a ni," a ti.

HTE Minister chuan, college zirlaite study tour atan sum dah ṭhin cheng nuai 50 chu cheng nuai 100-ah tihsan a nih thu sawiin, "Shankar IAS Academy nen ṭangkawpin free online IAS coaching kalpui a ni mek a, college hrang hrang tihchangtlun nan sorkarin sum tam tak a ruahman a ni," a ti. Zirtirtute an ṭan mar zel theih nan zirlaite'n zirtirtute an teh (assess) theih dan tur kalpui vat tum a nih thu leh, Mizoram State University din a nih hunah kut themthiam (skilling) zirna lamah kal nat tum a nih thu a sawi bawk.