Party digitise hmasa ber nih kan tum - Lalduhoma

Chief minister Lalduhoma, ZPM president chuan nimin khan ZPM, Southern Hqrs, Lunglei pisaah thu a sawi a; khawvel hmasawn mekah digitisation-a an luh mek thu leh sorkar chu digitisation lamah a inbuatsaih zel thu sawiin, ZPM pawh political party zinga digitise hmasa ber nih an tum thu a sawi.

Lalduhoma chuan, digitisation-ah an luh mek thu sawiin, "Kan ramin nasa takin hma kan sawnpui mek. Digitisation system kalpui ang hian ZPM pawh hma kan sawn zel theih nan kalpui turin kan inbuatsaih a, kan unit dinhmun leh political party dangte dinhmun thlenga hriat theih turin hma kan la dawn a, khawi lai block pawh an dinhmun kan hre zung zung tawh ang a, political party-a digitise hmasa ber nih kan tum mek," a ti.

ZPM chu policy vanga ding leh kal an nih thu sawiin Lalduhoma chuan, "Kan policy hi min hruaitu a ni a, hei hi kan inzirtirna pawh a ni a, kal sual theihna awm thei lakah hei hian min veng hle," a ti a; MLA inthlanpui awm leh tur atan a inbuatsaih mek tih sawiin, neutral-te’n an thawhpui leh theih nan ṭan an lak zel a pawimawh thu a sawi.

Chief Minister chuan, reformation (siamṭhatna) an kalpui mek thu sawiin, "Hei hi a sâwt hle. Tunah chuan bûkna a dik tawh hle a, pension dan loa late'n an surrender a, mipuite rilruah dikna a lut mek. Handholding-a loan late zingah rûl tha lo an awm lo a, medical re-imbursement bill thlengin a tlahniam ta. Kan ramah Pathian ram a thlen zel theih nan Pathian hmanrua ni turin keini party hi kan inbuatsaih zel a ṭul," a ti.

Lalduhoma chuan, chhiah âwl rûk vanga chhiah tam tak lut tur a luh lohnaah sorkarin hma a la zel dawn tih sawiin, "Mizoramah kalphung thlak danglamtu party kan ni a, he hmalakna hi kan bawhchhiat chuan kal zelna tur kan nei dawn," a ti a; sorkar hnathawkte chu ruling party apiang thawhpui thiama ṭawiawm turin a chah bawk.