Minister-in Revenue training hmanpui

Land Revenue and Settlement (LRS) minister B Lalchhanzova chuan nimin khan Administrative Training Institute (ATI)-ah MCS Foundation Course 2026 kal meka LRS department attachment training a hmanpui.

B Lalchhanzova chuan, Revenue administration chu MCS-te'n an hriat ngei tur subject pawimawh a nih thu a sawi a, "Revenue administrative reform pawh nasa takin sorkarin a kalpui mek a, Aizawl district bikah north leh south office ṭhen niin, tun hmaa settlement officer kha assistant commissioner (revenue) tia thlak a ni a, district tinah revenue chungchangah DC-te thuneihna pek belh an ni," a ti.

Revenue chu ram hmasawnna atana ṭangkai a nih thu sawiin B Lalchhanzova chuan, "Bul ṭantu ṭha nih a, revenue administration hrethiam satliah ni loa thil thar ṭha zawk a lo chhuah theih nan ngaihtuahna fim tak hmang ang che u. Fakna, duhsakna, recognition leh appreciation hmuh leh hmuh lohah buai lo ula, in hmaa hna awm chu hmachhawnin thil dik nia in hriat chu ti zel ang che u," a ti a; taima taka thawk turin a fuih.

Training hi LRS director Lalhmansanga'n a kaihruai a, MCS 2026 batch mi 20 an tel a ni.