Sorkarin Committee of Engineers a din

Mizoram sorkar chuan rél kawng kaihhnawih thil pawimawhte buaipui turin Committee of Engineers a din a, Northeast Frontier Railway (NER) Chief Bridge Engineer chu chairman a ni.

Sorkar thuchhuah tarlan danin, Ministry of Railways chuan Mizoramah rêl a luh tâk avangin railway leh a kaihhnawih hrang hrangah mipui leh thil sak/siam hrang hrang vawnhim a ṭul a ti a, chutiang lama hma latu tan Mizoram sorkarin Committee of Engineers a din a ni.

Committee-ah hian NER Chief Bridge Engineer chu chairman a ni a; member turte chu - PWD Chief Engineer (Roads) leh Chief Engineer (Highways), Irrigation and Water Resources Chief Engineer, Chief Conservator of Forests (Headquarters) leh Indian Meteorologival Department (IMD) Mizoram Regional Director te an ni.

Committee-in a ngaihtuah ber tur chu, hmun khata department hrang hrangte hna chungchanga buaina leh harsatna awm loa thawhho dan te, hnathawh inthuah a awm chânga thawhho dan tur duan te, Railway tibuai emaw, hnamhnawih reng reng hna enkawl uluk dan leh vil dan tur te, ruahsur/tuilian tur emaw puan chhuah dan tur mumal tak siam te, invenhimna leh tui danna siamte a ṭhat leh that loh endik te, department hrang hrang thawhhona ṭha siama kaihhruai te a ni.