KHAWTHLIR

Chawimawina hlan

Mizo Indian Reserves Police 1st Battalion commandant MS Dawngkima chuan November 6, 2026 khan Hav. PC Lalremawia, 1st IR hnenah ruihhlo donaa a thawh ṭhat avangin chawimawina pawisa leh thuchei a hlan. MS Dawngkima chuan, Kolasib district chu ramria awm a nih avangin dan leh thupek kengkawhtute'n thâ thlah loa ruihhlo an do a ṭul thu a sawi.

Bial mipui tan hun buatsaih

Aizawl North-III bialtu MLA K Sapdanga, minister chuan November 7, Inrinni khan a bial chhunga Edenthar Veng YMA Committee Room-ah veng chhung mipuite'n an dawr theihna hun 'Meet on the Public Programme' a buatsaih. Minister hi Edenthar Venga pawl leh mimal eng emaw zat an hmu a, veng hmasawnna tur leh mimal thil pawimawhte an thlen a ni.

Ruihhlo man

Assam Rifles leh Excise & Narcotics department mite chuan November 6, 2026 khan Archhuang khua, Siaha district-ah heroin gram 330.81 leh ganja gram 350 an man.

Chhim Bial KṬP Meet 2026 hmang

KṬP, Central Committee buatsaihin November 6, Zirtawpni zan aṭang khan Lunglei Venglai Presbyterian Kohhran biak-inah Chhim Bial KṬP Meet vawi sarihna hman a ni a, nizan khan a ṭiak. Inkhawmpuiah hian Synod puipate'n Pathian thuchah an sawi ṭhin a; inpâwlhona hun hman ṭhin a nih bakah, zaipawl leh mimal eng emaw zat an zai a ni.

I kawtkaiah sorkar

Mipuite'n sorkar hmalakna hrang hrangte an khuaa an chhawr ṭangkai theihna tura Lunglei Bawrhsap bultuma buatsaih ṭhin, 'I kawtkaiah sorkar' (Prashasan Gaon Ki Ore) chu November 6, 2026 khan Bunghmun RD Block chhunga Marpara South khuaah huaihawt leh a ni. Sorkar department hrang hrangte chu mipui dawr theih turin an inchhawp hnai a, Marpara South leh a chhehvel khuaa mi 230 velin an chhawr ṭangkai a ni.