Dan bawhchhiaa sangha man mi 4 man

Luia sangha leh nungcha man khapna (closed season) puan mekah dan bawhchhia mi pali man an ni tawh a; Kolasib district-ah dan bawhchhia ni ngeia hriatte lakah FIR thehluh niin, chhui mek a ni.

Mizoram sorkar chuan October 10 - November 30, 2026 chhung Mizoram chhunga lui zawng zawngah (autonomous district council huam chhung tel loin) nghalim, nghadawl, dawnṭial, lengphâr leh sangha fuan dangte man khapna (closed season) a puang tawh.

Sorkar thuchhuah tarlan danin, November 3, 2026 khan Lunglei Pukpui Local Council leh Fisheries department chuan closed season bawhchhia leh hmanraw hman phal loh (dynamo) hmanga sangha fuan lai mantua puh Lunglei Farm Veng leh Ramthar Veng mi pakhat ve ve an man a, Mizoram Fisheries Act Section 10 hmangin hrem an ni. Mi pahnih hian sangha kg 10 vel an man a ni.

November 6, 2026 khan Fisheries department chuan Lengpui Airport kawngah sangha man phal loh zawrh a nih thu report an dawng a, Mizoram Fisheries Act Section 6(vii) hmangin kawng kam bazara ṭhu Lengte leh Sihhmui mi pahnih hnen aṭangin nghalim zawrh lai kg 1 vel an man.

November 6 vek khan Kolasiba Fisheries department mite chuan Tuichhuahen lui chu tûra hrai a nih thu report an dawng a; sangha leh luia nungcha thi tam tak hmuh niin, dan bawhchhe tute man an nih ngei theih nan Sub-Headquarters YMA Kolasib nen ṭangdunin FIR an thehlut.

Fisheries department chuan dan bawhchhiatna a thleng leh ṭhin chu pawi an tih thu an tarlang a; dan phal loh hmanga sangha mantute bakah a zuar chhâwng tute thlenga dan anga hrem theih an nih avangin dan zawm turin mipui an ngen.