Minister-in YMA jubilee lawmna a hmanpui

Minister Lalrinpuii chuan November 7, Inrinni khan Lunglei Ramthar Branch YMA golden jubilee lawmna a hmanpui a; Lunglei Ramthar AOC Square-a YMA golden jubilee lungphun a hawng.

Lalrinpuii chuan, Ramthar Branch YΜΑ-in kum 50 a tling thei chu a lawmpui thu a sawi a, "Ramthar hi Lunglei khawpui tiropuitu veng lian leh pawimawh a nih angin, kawng hrang hranga a ṭhan belh zel nan khawtlang hruaitute nen lungrual takin theihtawp kan chhuah tlan zel ka beisei," a ti.

Ramthar Venga multipurpose hall tur chu tun hnaiah SASCI hnuaia project-ah dah a nih thu leh SLSC-ah pawm tawh a nih thu Lalrinpuii chuan a sawi a; YMA chu Kristian nun dan ṭha chhawm nung zel tur te, mi rethei leh chanhaite tana innghahna ni tur leh, ṭanpui ngai leh chhawmdawl ngaite dâwm chhuaktu ni zel turin a chah bawk.

Lunglei Ramthar Veng Branch YMA hi Lunglawn VC leh YMA hnuaia a awm laiin October 19, 1974 khan Lunglawn-II Nula Tlangval Committee tia din ṭan a ni a; Lunglawn khawtlang hruaitute leh YMA Sub-Headquarters phalnain November 7, 1976-ah Lunglawn-II YMA Branch tia thlak a ni. March 11, 1983 khan VC hran neia Ramthar Veng a din hnuah Ramthar Branch tia thlak a ni a, member 2,015 an awm mek.

Golden jubilee pual hian Lunglei High Powered Committee (HPC) fund Rs 16,15,000 sêngin Ramthar veng chhung kawngpui pahnih inkar luikawr chungah RCC-in Golden Jubilee Road siam a ni a, November 5, 2026 khan HPC vice chairman V Malsawmtluanga'n a hawng a ni.