Seven Sisters' Cultural Meet a ṭiak

Seven Sisters' Cultural Meet 2026 chu November 7, Inrinni khan Falkawna Zokhuaah chhunzawm a ni a, Tourism minister Lalnghinglova Hmar-in a hmanpui. Meet hi Inrinni khan a ṭiak.

Ni hnih awh Cultural Meet hi Ministry of Tribal Affairs bultuma buatsaih a ni a, thupui chu 'Unity in diversity: The Northeast symphony’ tih a ni. India hmarchhak state pasarih - Arunachal Pradesh, Assam, Manipur, Meghalaya, Mizoram, Nagaland, Tripura bakah Sikkim aiawhte telin, an hnam lâm ṭheuh an entir.

Inrinnia Cultural Meet-ah hian Tourism Minister chuan, India leh hmarchhak sawi hranna awm ṭhin chu ṭha a tih loh thu a sawi a, "India hmarchak state-te hi India khua leh tui dik tak vek kan ni a, chumi a nih rual chuan hmarchhak state-te hi kan ram pianphung leh history-ahte kan inhnaih zual bik. Danglam vek chung sia kan inpumkhatna hi India ram tiropuitu a ni," a ti.

Lalnghinglova Hmar chuan, "Hmarchhak state tin hian keimahni pual ṭheuhin thil ropui tak tak kan ti tawh a, amaherawhchu, kan ṭanrual a, kan inlungrual chuan tum thuhmun nen, a mala kan theih loh thil ropui tak tak kan ti thei a ni," a ti a; hmarchhak state dang aṭanga Meet hmanga telte chu Mizorama zin leh ngei tura sáwmin, Meet-a hnam ziarâng chi hrang hrang an hmuhte chu mi dang hrilh darhtu ni turin a chah.

Seven Sisters' Cultural Meet kharnaah hian DPAR secretary Dr YLN Reddy, Art & Culture director Carol VL MS Dawngkimi, sorkar hotu dangte leh mipui ṭhahnem tak an tel a ni.