Aizawla Zan Special Drive-ah Traffic police-in mi 297 man tawh

Aizawl Traffic Police chuan kumin 2026 chhungin Aizawla hmun hrang hrang 23-ah 'Zan Special Drive' ṭum nga an kalpui tawh a, chungah chuan lirthei dan bawhchhia mi 297 an man tawh. Dan bawhchhia an man zingah driving license nei loa lirthei khalh an tam ber.

Traffic Police hotute hnen aṭanga Vanglaini thu dawn danin, Aizawla Zan Special Drive hi kumin May 23, June 25, August 25, September 25 leh October 10-ah te neih a ni a; chu'nga lirthei dan bawhchhia mi 297 an mante chu The Motor Vehicles (Amendment) Act, 2019 hmanga hrem an ni.

Lirthei dan bawhchhia an man mi 297 zingah driving license nei loa lirthei khalh tam berin, mi 70 an awm a; phal loh zawnga tlan (wrong side) mi 49, exhaust pipe ri bengchheng vuah 27, helmet khum loa two wheeler khalh mi 25 leh rui chunga lirthei khalh 18-te chu a tam zual an ni.

Aizawl Traffic Police-in kumina Zan Special Drive an kalpui tawhah hian October 10 zan khan dan bawhchhia mi 76 manin, an man tam ber ṭum a ni a; August 25 khan mi 35 manin, an man tlem ber ṭum a ni thung.