KHAWTHLIR

Jersey sem

Women & Child Development department leh School Education department chuan nimin khan Aizawl DC conference hall-ah Beti Bachao Beti Padhao kaltlangin Aizawl district aiawha 43rd Mizoram Secondary School Games 2026-a tel tur zirlai hmeichhia 60 hnenah jersey an sem. 43rd Mizoram Secondary School Games, 2026 hi November 10-13, 2026 chhungin neih tur a ni.

Heroin man

Saitual police-te chuan nimin zing khan Keifang Kualmawiah Maruti Breeza AS-09 G-8855 aṭangin heroin gram 733 an man. Heroin hi Manipur aṭanga lak nia hriat a ni a, car khalhtu Johirul Islam (27), Rowmari, Nagaon district, Assam leh a thurualpui Guljar Hussein (19), Shilongari, Nagaon district, Assam te man nghal an ni.

Himna tur sawiho

Nimin khan Kolasib district mipuiin kumin Krismas leh kumthar mipuite'n him leh ralmuang taka hun an hman theih dan tur sawiho a ni a, district bawrhsap H Dolianbuaia'n a kaihruai. Halpuah leh halmawi khapna dan kengkawh turin District Level Committee din a ni a, lirthei tlan dan leh dan bawhchhiate khuahkhirh nan DTO kaihhruai committee din a ni. Zu leh ruihhlo dangte khauh taka khuahkhirh an rel bawk.

Khaw chhung fang

Khawzawl Road Protection Squad chuan nimin khan Khawzawl khaw chhung kawngpui an fang kual a, kawngpui kama lirthei dah ṭhinte chu senghawi tura an hriattir bakah, an dah lui zel a nih chuan dan angin pawisa an chawitir dawn thu an hrilh. Squad-ah hian sorkar department ṭhenkhatte bakah, Joint VC leh Sub-Hqrs YMA hruaitute an tel a, tun kar chhungin veng tin fan chhuah an tum a ni.

Neuro Ward thar

Ebenezer Medical Center chuan Neuro Ward thar an nei a, nimin khan neurologist Dr Lalawmpuia'n a hawng. Neuro Ward thar hawnna hi medical director Dr Vanlalsiama Chhangte-in a kaihruai a, chaplain Vanlalhuma'n ṭawngṭaiin a hlan. Ward thar hi neurologist-in englai pawhin a ṭhut chilh bakah, neurosurgeon a awm bawk tih Ebenezer Hospital thuchhuah chuan a tarlang.