Larsapin MSS training mekte a kâwm

Governor Gen. Vijay Kumar Singh chuan nimin khan Lok Bhavan Durbar Hall-ah Mizoram Secretariat Service (MSS) junior grade officer, Administrative Training Institute (ATI)-a foundation course training ti mekte a kâwm.

Larsap chuan, administrative service hnuaia hna rêng rêngah training ṭha neih hmasak a pawimawh thu sawiin, sorkarin an tana training ṭha tak a buatsaihah a tam thei ang ber thil zir nan hmang turin a chah a, "Thlen chinah duh tâwk mai loa inzir zel tur a ni. Zirna hian tawp chin a nei lo, thil zir kan bansan chuan tlakhniam lam kan pan ṭhin," a ti.

MSS officer-te chu an khawhawi tizaua intuai hriam zel tur te, an thawhna apiangah harsatna sukiangtu nih tum tura fuihin Gen. VK Singh chuan, "Mipui tana thawk in ni tih theihnghilh loh tur a ni a, danglamna thlentu nih tum tura ni. Mahni dinhmun aiin kan hnathawh avanga mite hriat hlawh nih kan tum zawk tur a ni," a ti a; Mizoram leh mipuite tana ṭha turah chuan dan zawm chunga huai taka thutlukna siam turin a chah.

MSS officer-te hi ATI director Rita Lalnunmawii Pachuau leh a thawhpuite'n an ṭawiawm a ni.