Dy. Chief Whip hlui C Sangzuala a thi

Mizoram sorkara deputy chief whip hlui C Sangzuala (83) h/o Lalthanpari, Chaltlang chu February 16, Pathianni zan dar 9:25 khan cancer avangin a thi.

C Sangzuala hi Mizoram Synod-ah a thawk ṭhin a, Synod aṭanga a pension hnuah MNF party zawmin, kum 1998 Assembly inthlanah Aizawl South-II aṭangin thlan tlin a ni. MLA atana a tlin hnuah government deputy chief whip leh Mizoram Customary Law chairman atan ruat a ni a, a hun chhungin Mizoram Customary Law pawm tura peih a ni.

C Sangzuala hi mimal sikul leh PWD-ahte a thawk ṭhin a, PWD-a a thawh laiin piantharna changin a hna a bànsan. Kum 1969-ah Theological School (tuna ATC)-ah Pathian thu a zir a, kum 1972-ah Mizoram Synod-in probationary pastor atan a la a, pastor erawh a ni lo.

Kum 1974 aṭangin C Sangzuala hian Synod Literature worker hna a thawk ṭan a, Synod-a a thawh chhungin Kristian Tlangau, Synod Newsletter leh Kristian Naupang chanchinbu-ahte editor a ni 

ṭhin a, kum 1982-1985 chhungin Synod secretary a ni bawk. A thih ni thleng hian C Sangzuala hi Chaltlang South Presbyterian-ah kohhran upa a ni.