Kawrthahah Kuhva Kût hman a ni: 'Sorkar hi kut hnathawktute lamah a ṭang zel dawn' - Home Minister
Hachhek Bial Kuhva Chingtu Pawl (HBKCP) chuan nimin khan Kawrthahah Kuhva Kût an hmang a; khuallian Home minister K Sapdanga chuan, ZPM sorkarah kuhva tawlhrûk vangin mi 292 man an ni a, thubuai 468 ziah luh a nih thu leh, sorkar chu kut hnathawktute lamah a ṭan zel dawn thu a sawi.
Home Minister chuan, pawl leh mimal ten dan zawm tur an neih vek thu a sawi a, "Mahni ṭha tih ang zawngte dan leh hrai nen a inrem em tih ngaihtuah fo a ṭha. Kan tluan pangngai hi chuan dan leh hrai hi kan mamawh lem lo a, harsatna kan tawh erawh chuan kan mamawh hmasak ber a ni ṭhin," a ti.
Harsatnate mahni thu thua sut tum lo a, pawl hruaitute hnena thlen thuai a ṭhat thu sawiin Minister chuan, "Pawl pawhin mahni thua sut mai tum loin, bialtu MLA/MP-te biakràwn nachang hriat a ṭha. Sorkar hi kut hna thawktute lamah a ṭang zel dawn," a ti a, sorkar nena inep zawnga kal chuan hlawhtlinna a bahlah theih thu a sawi.
K Sapdanga chuan, kuhvaah khawchhak rálin sorkar a dan zawh loh thu a sawi a, "Kum rei tak chhung khan kan harsatna lian ber chu kan kuhva rah kan hralh thei lo kha a ni a, a chhan chu Burma aṭanga dan loa kuhva rawn lut ṭhin khan kan kuhva thar hralhna a tichhia a, kan thlan tui a thlâwnin a far a, kan kut a thlâwnin a durh a ni," a ti.
Home Minister chuan, kuhva thartute'n a man an chhiar aia hniam féin kuhva chíngtute'n an rawn dawn ṭhin thu sawiin, "Mittui nen kan thawhrim rah kan tél ṭhin. Hetiang hi Burma aṭanga kuhva tawlhruk vang a ni ṭhin. Kuhva tawlhruk tihtawp tumin kuhva chíngtute'n hma kan la a, ramhnuai kawng pengṭhuamah riahbûk kan sual a, kan duty tlaivar a, kan tawn fuh changin a phurtu motor-ahte kan ṭuan ngawt ṭhin," a ti a; mahse, chungte chuan harsatna a sutkian zawh loh thu a sawi.
K Sapdanga chuan, sorkar tharah Chief Minister-in thupek khauh tak a siam a, ZPM sorkar aṭanga chawlhkar hnihnaah Champhaiah Burma kuhva phurh luh khap a nih tur thu an puan thu a sawi. Kuhva tawlhrûk donaah Police leh YMA-te an phûr thu sawiin, "Kum 2025 a pumhlûm meuh chuan kuhva tawlhrûk thubuai 468 ziah luh a ni a, mi 292 man an ni. Engkim huama kuhva tawlhtute dodal tur chuan huam thui a ngai viau mai. Pathianin min veng a, vawiinah hian Pathian hnenah lawmthu ka sawi a ni," a ti.
Home Minister chuan, YMA, Police leh Excise force-te thawhrimnain rah ṭha a chhuah tih chiang taka a lan thu sawiin, "Thawhrimnain rah ṭha a hlawh phawt chuan thlan tui a tlak tam poh leh kan hahdam a, kut durhte mai mai chu nui var var chungin kan sik keh pawp pawp tawh mai a ni," a ti a, thawhrimin awmzia a neih tâk thu a sawi.
K Sapdanga chuan, khawchhak lam aṭanga harsatna an su kiang a, an hlim dawn chauh tihah khawthlang lamah harsatna chi dang a piang leh tih sawiin, Mizorama dan ang taka kuhva an chìna an tharte leisaktute'n Assam lama phurh luh kawngah harsatna an tâwk tih Aizawla Kuhva Chingtu Pawl hruaitute aṭangin an dawn thu a tarlang.
Home Minister sawi danin, Assam-a kuhva phurh luh chungchanga harsatna chu sorkarin a hriat veleh a bawhzui nghal a, Mamit leh Kolasib DC hriattir niin, DC-te'n Assam-a an ṭhenawm DC-te an be tawh. Harsatna thlen dan chu chhui chian ngai a awma hriat a ni a, a hmuna kal turin DC-te an inbuatsaih mek.
Assam sorkara Border Development Minister biak a ni a, Aizawl Kuhva Chingtu Pawl hruaitute pawh a ṭul veleha Guwahati-a zin turin an inring a, anmahni kalpui turin adviser to CM Lalmuanpuia Punte, MLA a inring a ni.
Home Minister chuan, Mizoramah kût chi hrang hrang hman a ni ta nual tih sawiin, "Kuhva Kût hi a danglam a, kût satliah a ni lo. Kan thawhrim rah kan lawmna a ni," a ti a; Mizoram mipui leh Mizoram sorkar chawisanna kût a nih thu a sawi.
K Sapdanga chuan, kuhva chíngtute chu dan ngai pawimawha zâwm tur te, kuhva an tharte chu a quality vawng him tlat tur leh a leitute bum tum lo turtein a chah a, "Kan kuhva huan hi kan chhungkaw eizawnna mai a ni lo a, kan thlahte rilru dik pu tura sikul zahawm tak a ni. Kan khawtlang zahawmna kengtu a ni a, kan ram tihmingmawitu, kan GDP tisangtu a ni," a ti.
Kuhva Kûtah hian kût thlengtu Robert Romawia Royte, bialtu MLA pawhin thu a sawi a, HBKCP vice president Lalvenhima Ralte-in kût souvenir a tlangzarh. Kut hi vawiinah hman chhunzawm tur a ni a, chief minister Lalduhoma leh Land Resources, Soil & Water Conservation minister Lalthansangate'n an hmanpui ang.