Hunpuiah sumdawngte vil ngawrh dawn

Commissioner of State Tax chuan thuchhuah siamin, Krismas 2026 leh kumthar 2027 vuakvetah dik taka Goods & Services Tax (GST) lak khawm a nih theih nan Mizorama sumdawng leh dawrkai (trade and business establishments) zawng zawngte chu khauh lehzuala an vil dawn thu a tarlang.

State Tax Commissioner chuan, hunpui lo thleng tur vuakvetah Sairang rel chawlhhmun, Lengpui Airport leh kawngpuia Mizoram luhka hrang hrang, a bikin Vairengte kaltlanga Mizoramah bungrua tam tham tak a rawn luh belh beisei a nih thu a tarlang a, "Chhiah âwl rûk ven nan leh chhiah lak luh tipung turin State Tax hnuaia Enforcement Wing chuan Mizoram luhka pawimawhte aṭanga bungraw lutte enfiah leh endik hna khauh zawkin a kalpui dawn. Mizorama sumdawng leh dawrkai zawng zawngte chu khauh lehzuala vil an ni dawn," a ti.

GST dan ngai pawimawh tura sumdawngte leh dawrkaite ngenin Commissioner chuan, "Danin a phût lehkha pawimawh tel lo emaw, lehkha dik lo hmanga dik lo chunga bungrua phur leh kawlte chu The Mizoram Goods and Services Tax Act, 2017 hnuaiah man, hrên leh pawisa chawitira hrem theih an ni," a ti. Hunpui vuakvetah tluang taka sumdawnna bungrua a chet vel theih nan sumdawngte ṭha taka thawhpuiah a sawm bawk.

GST CHUNGCHANGA HRIAT TUR

☑ Bungrua lak luh leh phurh kualnaah GST danin a phût lehkha pawimawh - tax invoice leh e-way bill telin a ṭulna apiangah enfiah theihin kawl tur a ni.

☑ Bungrua thawn chhuah hmain invoice hlut zawng, lirthei (vehicle) number leh a phurtu chanchin dik tak ziah luh ṭhin tur.

☑ Bungraw luhka leh kawng laka enfiahna neih hunah bungraw phurtu leh thawktute'n lehkha pawimawh enfiah tura an dilte ṭha taka lo hmuh ṭhin tur a ni.