KHAWTHLIR

Thisen pe

Synod Higher Secondary School NSS chuan nimin khan an sikulah thisen pek rûnpui an huaihawt a; Civil Hospital, Aizawl tan thisen unit 146 an pe a, petute mipa 108 leh hmeichhia 38 an ni.

Mei zu mi 4 man

Aizawl District Anti-Tobacco Squad chuan nimin khan pisa pasarih - Higher & Technical Education (Technical Wing), ZOHANDCO, Transport, Sericulture, MBSE, SCERT leh Revenue (North District) pisaahte COTPA bawhchhia an awm leh awm loh an endik a; COTPA bawhchhiaa phal lohna hmuna mei zu mi pali manin, pawisa an chawitir a ni.

Sangha khawi zirtir

Planning department, Fisheries department leh SELCO Foundation te chuan nimin khan Bairabi Zero Point-a Chawnga Farm-ah nizung chakna hmanga sangha khawi dan, recirculating aquaculture system chungchang zirhona an buatsaih. Mizoram hmun hrang hranga sangha khawitu hlawhtling zual mi 11 an tel a ni.

Hnathawh thlirho

Khawzawl District Development Coordination & Monitoring Committee chu nimin khan an ṭhukhawm. Ṭhutkhawm hi Lok Sabha MP Richard Vanlalhmangaiha'n a kaihruai a, sorkar laipui scheme hrang hranga hmalakna, hnathawh, hmachhawp leh harsatna te sawiho a ni. MP chuan, department hotute chu district hmasawnna atan theihtawp chhuah zel turin a fuih a; an harsatnate state sorkar leh sorkar laipui hotute hnenah a thlensak tur thu a sawi.

Hmanrua sem

Social Welfare department leh ALIMCO chuan nimin khan vohbik (persons with disability)-te leh kum 60 chin chung lam mi 272 hnenah an chetvelna atana puitu tur hmanrua (assistive device) 1,187 an sem. Hmanraw semna inkhawm hi DC pisa tualah buatsaih niin, Siaha district bawrhsap Saizikpuii'n a hmanpui a; hmanruate chu Rs 21,87,838 man a ni.