RDA Dept leh SBI ten thuthlung an ziak

Rural Development & Administration (RDA) minister Prof. Lalnilawma pisaah nimin khan RDA department leh State Bank of India chuan SAMARTH portal leh Payment Gateway chungchangah thawhhona thuthlung, memorandum of understanding (MoU) an ziak.

Village council-te'n digital payment kaltlanga own source revenue (OSR) an lak khawm theihna tur MoU-ah hian RDA department aiawhin Local Administration director Dr Lalngura Tlau leh SBI aiawhin deputy general manager Manish Uppal ten hming an ziak a ni.

Thawhhona kaltlang hian VC dan bu 'The Mizoram Village Council Act, 2025' hmanga VC-te'n mipui aṭanga chhiah leh khawn chi thil hrang hrang an lak khawm theihte chu payment gateway kaltlangin awlsam, felfai leh langtlang zawkin an la khawm thei tawh dawn tih tarlan a ni.

Payment gateway hian thingtlang mipuite'n VC dan bu-in a phal ang zela chhiah an pekna turah online hmangin an pe thei dawn a, an pek dan transaction zawng zawng pawh SAMARTH portal-ah tihfel leh en theihin a awm dawn a ni.

Minister Prof. Lalnilawma chuan, sorkarin thingtlang hmasawnna tura hma a laknaah sum leh paia intodelh thei tura VC-te thuam chak an nih theih nan OSR a ngaih pawimawh thu a sawi a, "OSR neih ṭha VC-te chuan 16th Finance Commission hnuaiah performance grant an dawng thei dawn. SAMARTH leh Payment Gateway hmanga VC-te OSR tihchak hi Viksit Bharat 2047 hlawhtlinna tura kawng pawimawh tak pakhat a ni," a ti.