Mizorama political party zingah member ngah ber nih kan tum dawn - Lalduhoma

ZPM president Lalduhoma, chief minister chuan nimin khan Mamit Indoor Hall-ah ZPM Mamit Central Block Conference a hmanpui a; Mizorama political party zingah member ngah ber nih an tum dawn thu a sawi.

Lalduhoma chuan, India ram leh Mizoramah party member intamsiak zawngin an kal laklawh thu a sawi a, "Keini pawhin kan tih ve a ṭul thin. Kan ti rau rau a nih chuan Mizoramah party member tam ber nih kan tum ang a, inthlan lehah pawh Mamit bial mai ni loin, Mamit district pumah ZPM chak kan tum dawn," a ti.

ZPM President chuan, thiamna ṭhang zelah an party-in hma an sawn zel a ngaih thu sawiin, "Tunah hian apps kan duang mek a, party dinhmun unit leh block-te Mizoram bial zawng zawng hi kan digitise ang," a ti a; India rama ziak leh chhiar thiam tam berna state Mizorama ruling party-in an party dinhmun awlsam taka phone hmanga en zung zung theihin an siam dawn thu a sawi.

ZPM chu mipuite'n ram rorelna ṭha Mizoramah a thlenna tura an thlan a nih vangin an lakah mipui beiseina a sang bik niin Duhoma chuan a sawi a, "Party dangte'n an tih an enliam mai mai ang hi ZPM-in kan tih ve chuan kan tih ve turah an ngai lo a, kan lakah an beiseina a sang bik a, an thîkthu pawh a chhe bik," a ti.

Lalduhoma chuan, unit leh block hruaitute chu thawhpui nuam an nih a ṭul a, neutral-te pawhin an kaihruaina hnuaia tel ve an chak theih nan fel leh ṭha taka ZPM an kaihruai a ngaih thu a sawi bawk. ZPM President hian an party-ah mi 1,235 a lawm lut niin ZPM thuchhuah chuan a tarlang.

Inkhawm hi ZPM Mamit Central Block president Selbuanga'n a kaihruai a, ZPM vice president Lalmuanpuia Punte, MLA leh minister pahnih Lalthansanga leh PC Vanlalruata te pawhin thu an sawi a ni.