Hriselna lama thawkte an invawn thianghlim a ṭul - Minister Lalrinpuii

Health Workers’ Training School, Kulikawn chuan nimin khan an conference hall-ah zirlai batch 42-nate lak luhna leh thu tiamtirna, Capping & Lamp Lighting Ceremony an buatsaih a; an hun hmanpuitu Health minister Lalrinpuii chuan, hriselna lam thawkte chu an invawn thianghlim a ṭul thu a sawi.

Health Minister chuan, hriselna lama thawktute chu an invawn thianghlim reng a ṭul thu sawiin, Mizorama HIV leh cancer hluar zel do tur te, mipat hmeichhiatna hman khawlohna lama fihlim tur te, ruihhlo hman sual leh zûk leh hmuam lakahte fihlim turin health worker zir turte a chah.

Thingtlang khaw hrang hrangah health worker dah a nih theih nan sorkarin hma a lak tur thu sawiin Lalrinpuii chuan, "Mizoram mai ni lo, foreign lamahte pawh health worker-te chu hna thawkin an chhuak nasa tawh hle," a ti a; Mizoram Youth Commission leh LESDE te nen thawkhoin inthawn chhuah dan tur kawng a awm zel tur thu a sawi.

Health Minister chuan, Sap Kristian missionary-te'n damdawi-in an din a, hriselna kawng an lo sut kuak thu sawiin, "Tihdam rawngbawlna, nurse leh health worker hnate a lar ta hle. Thingtlang lamin damdawi lam thiam an mamawhna a sang zel a, health worker traning school-te pawh din a lo ni chho ta a ni," a ti.

Health Workers Training School hi kum 1957 khan Civil Hospital, Aizawlah bul ṭan a ni a, kum 1981 aṭanga kum 2026 thlengin mi 1,725-in an zir chhuak tawh. Zirlai thar lak luhte chu mi 48 niin, mipa 23 leh hmeichhia 25 an ni a; Mizoram khaw hrang hrang 29 aṭanga kal khawm an niin, SCEEN hnuaia zirlai lak hmasak ber an ni.