CYMA hnuaia ruihhlo mante tichhia

Central YMA hnuaia ruihhlo dotu Central Anti Drug Squad (CADS) batch 3-na leh Zone Anti Drug Squad (ZADS)-te ruihhlo man tam tham tak chu November 9, Thawhṭanni zan khan CYMA Hall-ah tihchhiat a ni. Ruihhlo tihchhiatna inkhawmah hian CADS batch 4-naa tel turte lak luh an ni bawk.

CADS leh ZADS-te'n ruihhlo an mante tihralna inkhawm hi CYMA finance secretary MS Ralte-in a kaihruai a, CADS batch 3-na secretary Israela, YMA CEC member-in CADS 3rd Batch leh Zone (I-XI)-te'n ruihhlo donaa hma an lak dan leh ruihhlo an man chanchin a sawi. CYMA president R Lalngheta'n CADS 4th Batch lak luhna hun a hman bakah, thuchah a sawi a ni.

CADS 3rd Batch leh ZADS 11-te chuan heroin (no. 4) kg. 1.264, hawng 30, TicTac bûr 566, chhinsen 75 leh Bagha cap 484 an man a; methamphetamine mûm 789 leh crystal meth gram 121 an man bakah, damdawi ruihhlo dang eng emaw zat an man.

Ruihhlo kaihhnawihah mi 736 man an ni a, mi mante zinga 626 chu CADS-te'n an mante niin, mi 110-te chu ZADS-te'n an man an ni. Mi an man zinga 374 chu counselling class an kaltir a, mi 89 chu ruihhlo ngaite enkawlna home/centre-ah dahin, mi 83 chu Excise & Narcotics leh Police hnenah an hlan thung.