Sairang pan rél chesualah thi awm lo; Chhûnah chêtsualna hmun chhuahsan

Kolkata - Sairang Express rêl, train no. 13125 chu nimin zing dar 6:54 khan Digaru Railway Station bulah a chesual a, réla chuang zingah thi leh hliam an awm lo. Sairang pan turte chu nimin chhûn khan rel dang hmangin an chhuak leh nghal.

Northeast Frontier Railway official-te aṭanga thu dawn danin, Kolkata-Sairang rêl hian November 10, Thawhlehni chawhma dar 10:45 khan Kolkata a chhuahsan a, ruahman dan chuan nizan dar 6:30 vela Sairang thleng tur a ni. Digaru rel chawlhhmun bulah rél dang kawng a ken dawn laiin thunun zawh a nih loh avangin a chesual a; rél kawng aṭangin coach panga invawrh chhuak mah se, thi leh hliam an awm lo a ni.

NF Railway thuneitute'n thil ṭul zawng zawng buaipui nghalin, NF Railway General Manager hoin chetsualna hmun an tlawh nghal a, khualzinte kal zelna atan rél dang an ngaihtuah.

Sairang pan turte tana rél ruahman chuan nimin chhun dar 11:30 khan Digaru station a chhuahsan a, Lumding Station-ah passenger zawng zawng tan chawchhun an buatsaih a ni. NF Railway hotute chuan, passenger zawng zawngin an tum hmun ṭheuh him takin an thleng ang tih an tiam thu an tarlang.