KHAWTHLIR

SIC ruat thar

Mizoram sorkar chuan tun hnai khan state information commissioner (SIC) atan C Zothankhuma, IDAS a ruat thar. C Zothankhuma hian Mizoram State Information Commission-a a pisa a luah aṭangin SIC mawphurhna a chelh ṭana chhiar tur a ni.

Kawng kam endik

Khawzawl District Highway Safety Task Force chuan nimin khan Khawzawl district chhunga kawngpui fang kualin an endik. Highway Right of Way (ROW) huam chhunga lirthei chêt velna atana hnawk thei leh chetsualna thlen thei tura lirthei/bungraw dah hnawkte enfiahin, kawngpui sira in leh dawr tê sa mek, ROW huam chhunga awm nia langte leh highway atana hnawksak thei nia ngaihte an chhinchhiah a, a ṭul angin an bawhzui dawn a ni.

IDSP inzirtir

Integrated Disease Surveillance Programme (IDSP) leh Local Administrative department (LAD) chuan nimin khan LAD conference hall-ah Chhimphei huam chhunga khaw 20-a village council member 40-te pualin 'Public Health Programmes under IDSP & Community Reporting' zirhona an buatsaih.

Namaste Award

Serchhip district bawrhsap Paul L Khuma chu Amazing Namaste Foundation buatsaih Namaste Awards 2026 dawng tura thlan a ni. Award hi Public Service & Governance category-ah dawng tura thlan a ni a, he category-a hmarchhak state aṭanga dawng hmasa ber tur a ni. Namaste Awards hi India hmarchhak hmasawnna tura thawh hlâwk, mi dangte tana entawn tlak kalphung thar ngaihtuah thiamte chawimawina a ni a; November 14, 2026 hian Mumbai-ah hlan a ni ang.

Apprenticeship Mela

Lawngtlai DC pisa chuan nimin khan DC pisa tualzawlah Pradhan Mantri National Apprenticeship Mela an buatsaih a, additional DC TT Beikhaizi-a'n a hawng. PM-NAM hi skill labour neih theihna tura ruahman, zirlai ni chunga mahni inchâwm theihna tura duan a ni a; lawmman Rs 1,500 aia tam lo pek ṭhin niin, a chhawrtuin 75% leh sorkarin 25% an tum ṭhin. PM-NAM-ah hian kum 14 chung lam tan registration tih theih a ni.