Ei siamtu Rs 41,000 chawi turin hrem

Aizawl DC pisaa Adjudicating Officer chuan Babies Online Kitchen, Rangvamual chu ei tur thianghlim lo, mi tana harsatna thlen thei an siam avangin Rs 41,000 chawi turin a hrem.

Adjucating officer Zoramsiama Hmar, additional DC-in November 9, 2026-a order a chhuaha a lan danin, October 9, 2026 khan Babies Online Kitchen-a siam chicken egg roll leh chicken momo eitu mi 14 chu an pum a ná a, khawsik leh kawṭhalo an nei bawk.

Mi 14-te'n an eite chu a sample leh an êk sample Zoram Medical College & Hospital-a Microbiology department laboratory-ah endik a ni a, pathogenic organism (E coli) hmuh a ni. Babies Online Kitchen hian Food Safety and Standards Authority of India (FSSAI) licence dik tak nei loin ei leh in siamin an zuar tih tarlan a ni bawk.

Babies Online Kitchen neitu Irene Zothansangi chu insawifiah tura tih a nih angin insawifiah mah se, hrem a ni a; Food Safety and Standards Act, 2006 Section 63 hnuaiah Rs 20,000 chawi tura tih a nih bakah, an thil siam eitu damlo zui ta mi 14-te hnenah zangnadawmna Rs 1,500 ṭheuh pe tura tih a ni. Irene Zothansangi hi a pawisa chawi turte chu thupek chhuah aṭanga ni 14 chhungin pe tura hriattir a ni.

Thu dawn danin, Babies Online Kitchen thil siam eitutea harsatna thleng hi Food & Drugs Administration hotute chuan an bawhzui a, an chhui zuina aṭanga report siamin, Adjucating Officer hnenah an thlen thu an sawi a; Adjucating Officer-in a hrem bâk chu FDA-in a hrem ve loh thu an sawi.