Lal Khawkunga Hall tur lungphùm phúm

Rural Development & Administration minister Prof. Lalnilawma chuan nimin khan Bukpuiah Lal Khawkunga Hall sakna tur lungphùm a phúm a; Assembly speaker Lalbiakzama (Lal Khawkunga tupa) leh bialtu MLA K Laldawngliana ten an hmanpui.

Lal Khawkunga Hall hi SASCI Part-IX (2025-26) Incentive for Efficiency in Financial Management hnuaia hmuh a ni a, a sakna cheng nuai 270 ruahman niin, satu tur (contractor) chu Tribal Youth Construction, Falkland Veng, Aizawl a ni.

Prof. Lalnilawma chuan, Lal Khawkunga Hall sak a nih theihna tura hma latu RDA department leh a kaihhnawihte chungah a lawm thu sawiin, "Bukpui khua hian pi leh pute khua rawn hre rengtu Speaker in nei a, in vannei tak zet. Hall sak a nih theih nan hian Speaker hian theihtawp a chhuah a ni," a ti a; Khawkunga Hall tur chu Mizorama hall ṭha pawl a nih theih nan ṭha taka en zui turin khawtlang mipui a chah.

Lalbiakzama chuan, a pu Khawkunga chu Mizo lalte zinga Pathian thu awih hmasa pawl a nih thu a sawi a; sorkar auhla 'Kan ram politics-ah Pathian ram thleng rawh se' tih a taka thlentirtu ni tura mipui sawmin, "Ram inrelbawlnaah hmasawnna tak tak thleng turin political will a pawimawh a, political will hi Pathian duh dana kalpui a nih chuan ram politics-ah Pathian ram a thleng dawn a ni, " a ti.

Bialtu MLA K Laldawngliana pawhin thu sawiin, sorkarin eptu bial sawi loa khawtlang mamawh hall ṭha tak a pek avangin sorkar chungah a lawm thu a sawi a ni.