Bán elha champion-te Minister-in lawmpui

Sports & Youth Services minister Lalnghinglova Hmar chuan nimin khan a pisaah 47th World Arm Wrestling & 28th PARA Arm Wrestling Championship 2026-a medal la Mizo infiammi pangate lawmpuina a buatsaih a; Sports Incentive Cash Award sem hunah medal latute'n award an dawn vek dawn thu a sawi.

Lalnghinglova Hmar chuan, medal latte chu India ram mai ni lo, khawvel huap inelnaa Mizoram tihmingṭhatute an nih thu a sawi a, "Kan chhuang che u. Vawiinah lawmpuina tih chiam kan tum lo a, a lawmawm em a, thingpui inho ang u kan ti a ni. Lawmman tak tak chu incentive cash award sem hunah in dawng dawn a, Sports Incentive Cash Award sem hunah medal latuten in dawng vek dawn," a ti.

47th World Arm Wresting & 28th PARA Arm Wresting Championship 2026 hi India-in October 28 - November 7, 2026 chhungin New Delhi-ah a thleng a, ram 65 aṭangin infiammi 2,000 vel an tel. India ram aṭangin mi 260 vel telin, Mizo 14 an tel a; Mizo 14 zinga pangain gold medal pali, silver medal pakhat leh bronze medal pakhat an elh chhuak a ni.