Aizawlah SVANidhi Mahotsav buatsaih

Urban Development and Poverty Alleviation (UDPA) department chuan mahni kutkawih emaw, khàr chhàwn thei leh thlai te kawng sir leh hmun remchanga zuar ṭhinte pualin nimin khan Vanapa Hall-ah SVANidhi Mahotsav an buatsaih a, UDPA minister K Sapdanga'n a hawng.

Kumina SVANidhi Mahotsav-ah hian chawhnu lamah kawng sira thil zuarte leh an chhungte pualin health campaign leh awareness buatsaih a ni.

UDPA Minister chuan SVANidhi Mahotsav chu kawng sira thil zuarte tan kûtpui a nih thu a sawi a, "SVANidhi hi Street Vendor’s Atma Nirbhar Nidhi tihna a ni. Atma Nirbhar chu mahnia ding thei, inrintawk tihna a ni a, Mahotsav chu kûtpui, lawmna hunpui tihna a ni thung. A tum ber chu sorkar laipuiin PM SVANidhi scheme hnuaiah kawng sira thil zuarte tan eizawnna bul ṭan nana sum pûk, working capital loan a pe a, Covid hnua an eizawnna an din thar leh theihna tura puih a ni," a ti.

Mahotsav chu scheme hlawhtlinna lawmna leh a dawngtute leh an chhungte chawimawina tura buatsaih a nih thu sawiin K Sapdanga chuan, "A tum ber chu thil zuarte hlawhtlinna chanchin sawi chhuah a, an thawh rah leh India ram economy-a an thawh hlawkzia hriatpui a ni," a ti a; street vendor-te hlawhtlinna chanchin leh ram leh khawtlang tana an thawhte lawmna leh hriatpuina kût a nih thu a sawi.

UDPA Minister sawin danin, a tirah chuan Ministry of Housing and Urban Affairs bultumin July 9-31, 2022 chhungin state/union territory 33-a khawpui 75-ah buatsaih a ni a; a hnuah pawh hmun hrang hrangah buatsaih leh ṭhin a ni.

PM-SVANidhi hi June 1, 2020 khan tlangzarh a ni a, Mizoramah chuan July 2020-ah loan pek ṭan a ni. Covid-19 vanga street vendor-te'n eizawnnaa harsatna an tawh puihna tura duan niin, loan pek zat chu Rs 10,000 a ni a; street vendor-te'n an chhawr ṭangkai avangin August 2025 aṭangin SVANidhi 2.0 kalpui niin, 2030 thleng kalpui tura duan a ni. Mizoramah PM-SVANidhi hnuaia loan la mi 4,878 an awm tawh.