KHAWTHLIR

Thisen pe

Mizo Higher Secondary School NSS chuan nimin khan Civil Hospital, Aizawl tan thisen unit 48 an pe a, petute mipa 36 leh hmeichhia 12 an ni.

FK Polyclinic hawng

Health & Family Welfare minister Lalrinpuii chuan nimin khan kal (kidney) ṭha lote'n dialysis an tih theihna tura din FK Polyclinic chu F Kapsanga Building, Chhinga Vengah a hawng. Minister chuan, vaihlo zûk leh hmuam chu cancer tam tak thlentu a nih thu sawiin, Mizoram mipuite zûk leh hmuama an fihlim a ṭul thu leh hrisel taka awm turin nunphung uluk a ṭul thu a sawi.

MP hoin ṭhukhawm

November 11, Nilaini khan Champhai DISHA an ṭhu a, nimin khan Saitual DISHA an ṭhu bawk a; ṭhutkhawm hi Lok Sabha MP Richard Vanlalhmangaiha'n kaihruaiin, sorkar laipui scheme hmanga hnathawh, hmalakna, hmachhawp leh harsatna te sawiho a ni. MP chuan, DISHA meeting chu hmasawnna tura sorkar laipui scheme-te mipuiin an chhawr tur angin kalpui a ni em tih vil zuina a nih thu sawiin, theihtawp chhuaha mipui tan hma la zel turin sorkar hotute a chah.

LC House hawng

Minister Vanlalhlana chuan November 11, Nilaini khan a bial Aizawl North-I chhunga Leitan Ramthar Local Council House a hawng. Vanlalhlana chuan, khawtlang hruaitute chu inrelbawlnaah dikna, rinawmna, taimakna, inlungrualna leh thawhhona ṭha te vawng reng turin a chah.

NFBS dawng tur thlang

Siaha District Committee for the Implementation of National Social Assistance Programme (NSAP) chu nimin khan district bawrhsap Saizikpuii hoin an ṭhukhawm a; Siaha district-a chhungkaw innghahna leh eizawngtu ber a thiha sorkar aṭanga ṭanpuina, National Family Benefit Scheme 2025-26 dawng turin mi 15 an thlang. Scheme hi BPL chhungkuate tan a ni a, ṭanpuina Rs 20,000 dawn theih a ni.