Sorkar hriatpuia Aadhaar card siamna Minister-in Edenthar Vengah a hawng

Sorkar hriatpuinaa Aadhaar card siamna, Aadhaar Seva Kendra chu nimin khan Edenthar Vengah bialtu MLA K Sapdanga, minister-in a hawng.

K Sapdanga chuan, ni tin nunah Aadhaar card a pawimawh tawh thu sawiin, "Bank account hawng turin kan mamawh a, ration buhfai la turin a ngai tawh. Pension la turte tan a ṭul a, sorkar scheme hrang hrangte chhawr ṭangkai tur pawhin neih ngei a ngai tawh. Tunah chuan kan document pawimawh tak a ni tawh. Chutiang taka pawimawh Aadhaar card buaipuina hmun, harsatna neite tana pan tur kan nei ta hi a lawmawm hle a ni," a ti.

Aadhaar card siam leh siamṭhat ngaiah thil tih a harsat ṭhin thu sawiin Sapdanga chuan, "Khawia kal tur nge, tu nge kan zawh ang tih hriat a har ṭhin. Hmun hrang hrangah kalin, rei tak chhung nghah a ngai ṭhin a, a châng chuan an lo siamṭha dik tawk lo ṭhin," a ti a; Aadhaar Seva Kendra-ah chuan Aadhaar card chungchanga harsatna leh mamawhte tih theih vek a nih dawn thu a sawi.

Minister chuan Aadhaar Seva Kendra chu mipuite tan a ṭangkai hle dawn thu sawiin, "A bikin upa zawk te, hmeithei, zirlai leh pension late tan a ṭangkai lehzual ang. Kan Aadhaar card dik lote Kendra-ah hian awlsam tak leh rang takin siamṭhat theih a ni dawn a ni," a ti.

K Sapdanga chuan, Aadhaar card vawng uluk a ngaih thu sawiin, number pawimawhte mi dang hrilh mai mai loh tur a nih thu a sawi a, "Aadhaar card kan siamṭha duh a nih pawhin sorkar pawmpui Aadhaar Seva Kendra kan pan tur a ni," a ti. Aadhaar card leh mobile phone number thlun zawm ngei a pawimawh thu a sawi bawk.