Halpuah kawl, zuar & hal lo turin hriattir

Aizawl district magistrate Lalhriatpuia leh Saitual district bawrhsap Srinivas Sadi te chuan hriattirna chhuahin, Krismas leh kumthar lo thleng turah hâlpuah leh a kaihhnawih khapna dan 'The Mizoram Regulation of Fireworks Act, 2026' zâwm turin an district ve vea mipui an hriattir.

Lalhriatpuia chuan, MRFA 2026 hnuaiah halpuah, halmawi leh a kaihhnawih chi rêng rêng kawl, zawrh leh hâl khap a nih thu a tarlang a, "Dan zâwm lo man an awm a nih chuan thla thum thleng lung-in tàn emaw, Rs 50,000 thleng chawitir emaw, a pahnih emawa hrem theih a ni. Sorkar hnathawk dan bawhchhia man an nih chuan an chungah hremna khauh zawk lek a ni ang," a ti.

Sorkar department hrang hrang enkawl check gate tinah Aizawl district-a lut tur lirthei enfiah a nih dawn thu tarlangin Bawrhsap chuan, "Dan phal loh thil an phurh leh phurh loh uluk taka enfiah an ni ang a, phur lui lirthei man an awm chuan dan anga hrem an ni ang," a ti. Mipui, kohhran, local council leh tlawmngai pawl te chu dan thar zir chiang a, ṭha taka zawm a nih theih nan ṭhahnemngai taka thuneitute thawhpui turin a ngen bawk.