National Pharmacy Week 2026 pualin Antimicrobial Resistance Awareness Rally

Mizoram State Pharmacy Council chuan National Pharmacy Week 2026 pualin nimin khan Antimicrobial Resistance (AMR) Awareness Rally a buatsaih a, Health & Family Welfare minister Lalrinpuii'n hmanpuiin, rally-a telte Millennium Centre kawt aṭangin a vailiam.

AMR Awareness Rally puala inkhawm hi Pharmacy Council of India executive member Dr H Lalhlenmawia'n a kaihruai a; pharmacist-te leh pharmacy zirlai mi 500 vel telin, Millennium Centre kawt aṭangin Vanapa Hall kawt thleng an kal. Vanapa Hall kawta Rally kharna inkhawmah Mizoram Pharmacists Association president Dr Zothanpuia'n thuchah a sawi.

Health Minister chuan, Rally thupui, 'Swasth Bharat: Combating Antimicrobial Resistance' tih chuan antimicrobial resistance (AMR) chungchangah pharmacist-te'n mawhphurhna pawimawh tak an nei tih a lantir thu a sawi a, "Pharmacist-te'n dik taka damdawi hman dan hrilhfiah te, antibiotic mamawh loha hman loh inzirtir te, prescription dik lo taka damdawi pek loh leh damdawi hman dan chungchang mipui hriattir kawngah te hma in lak zel a ṭul," a ti.

Antibiotic damdawite chu hman tlak a nih zel theih nan humhalh turin Lalrinpuii chuan pharmacist-te a fuih a, "AMR awareness rally hi dik taka antibiotic damdawi hman inzirtirna a nih angin, mamawh a nih chauha qualified healthcare professional thurawn ang zela hman tur a ni," a ti. Dik taka damdawi hman pawimawhna mipui hnena zirtir zel turin kal khawmte a chah bawk.

National Pharmacy Week pual hian vawiinah a lawmna hun hman leh a ni ang.