MSE chungchang dan inzirtir

Commerce & Industries, Geology & Mining department chuan nimin khan Mizoram sorkar hnuaia department tina nodal officer-te pualin Taxation auditorium-ah Mizoram Procurement Preference Policy for Micro and Small Enterprises (MSEs), 2025 inhrilhfiahna an buatsaih.

Mizoram Procure-ment Preference Policy for Micro and Small Enterprises (MSEs), 2025 hi Mizorama thar leh siam chhuah micro and small enterprises (MSE)-te ṭhan len zelna tur leh, Mizoram hmasawnna tura ruahman a ni.

Policy hian sorkar department-te'n kum khata an thil lei (procure) 25% chu tualchhung MSE aṭanga lei turin a ti a; tender leh quotation chhannaah state pawn supplier leh bidder-te nen an inel a nih chuan tualchhung MSE-te thlang zawk turin a ti bawk.