2047-ah thla khata mi 1 sum lakluh Rs 1,35,000-a tihpun tum a ni - Chief Minister

Chief minister Lalduhoma chuan, kum 2027-ah India GDP 1% thawkchhuak ve thei tura Mizoram siam an tum thu sawiin, chutiang tur chuan Mizorama chengte sum lakluh zat (per capita income) chu kum 2047-ah chuan thla khatah Rs 1,35,000 vela tihpun an tum thu a sawi.

Chief Minister hian nimin khan Zote South 'Haw Runpui' a hmanpuinaah Mizoram Vision chungchang sawiin, "India sorkarin kum 2047-a ram changkang nih a tum angin keini pawhin chu mi kumah chuan India GDP 1% thawh chhuah ve theih kan tum a, chutiang ni tur chuan kum 2047-a kan per capita income (mi pakhat sum lakluh) chu kum khatah cheng nuai 16 a tlin a ngai a, tunah hian Rs 3,25,000 ang vela chhût a ni. Thla khata Rs 27,000 ṭheuh lalut ang kan ni a, hei hi kum 2047-ah chuan a let nga (Rs 1,35,000) vela tihpun tum a ni," a ti.

Kut hnathawktute chawikan nan thlai chi kua-ah support price pek a nih thu sawiin Lalduhoma chuan, "A sawngbawlna (processing) lamah chak taka hmalak a ni a, ṭhalaite pawh hna zawngtu aia hna siamtu an nih theihna turin Bana Kaih aṭangin loan ṭha-mi siam niin, venture capital fund siam hial a ni, " a ti a; infrastructure ṭha nei tur leh insumdawn tawnna ṭha lehzual nei turin Indo-Thailand Corridor thlengin ngaihtuahna sên mek a nih thu a sawi.

Lalduhoma chuan, "Mizote hi hnam rethei kan ni reng tur a ni lo. Kawng tinrenga hnam dangte elpha turin taihmakna leh rinawmna vawng zel ang u," a ti a; Zote South chu kum 2007-a kum 100 (centenary) lawm tawh, Mizorama khaw hlun ber zinga mi, khaw thil phal, mautam lai pawha mite pûrchâwkna hmun a nih thu sawiin, Zote South khaw tana sorkar hmalakna hrang hrangte a tarlang. Kum 1889-a piang Zote South khaw chhuak, Mizo hmeichhe zinga nurse hmasa ber leh sorkar hnathawk hmasa ber Pi Pawngi chanchin ziahna bu a tlangzarh nghal bawk.

Zote South hi Mizoram chhim leh hmar inrina a awm niin, Lunglei district-ah hun rei tak a awm hnuah Serchhip district-ah rin luh a ni a, in 150 awmin, mihring 837 an cheng mek a ni.