Rohmingthangi thlan leh hriatrengna tihchhiat chungchangah Chakma hruaitute'n YMA hruaitute hmaah intiamkamna an ziak

Nimin khan Chakma hruaitute chuan Rajiv Nagar-I VC House-ah missionary martar Rohmingthangi thlan leh a hriatrengna tihchhiat chungchang Chakma hruaitute'n intiamkamna an ziak. He hun hi Dampa Group YMA president B Ramngaihzuala chuan a kaihruai a; Central YMA, Mamit Sub-Headquarters YMA, Dampa Group YMA, Rajiv Nagar VC-I leh VC-II te, Joint Young Chakma Association (YCA) Rajiv Nagar OB te leh Rajiv Nagar Branch YMA OB te an tel.

CYMA president R Lalngheta chuan thu sawiin, "Rajiv Nagar-a missionary Nl. Rohmingthangi rawng taka thah a nihna hmun chhinchhiahna tihchhiat leh a sakna hmanrua rukbo a ni ṭhin hi kan dem hle. Hetiang thil hi a thlen nawn leh a rem tawh lo. Nl. Rohmingthangi thah a nih avanga Mizo mipuite rilru a nat tawh tehreng nen, amah hriatrengna tichhe zawnga khawsa an awm leh zel hi CYMA chuan a hrethiam tawh dawn lo," a ti a, YCA hruaitute chu an mi leh sate thunuh turin a chah.

Mizoram khua leh tui dik takte nen chuan ṭha taka awm tlan an duh thu sawiin R Lalngheta chuan, "Thla hmasa lawka NGO Co-Ordination Committee neihah pawh YCA hruaitute special invitation-a sawmve an ni. Mizote hi tihnuam tak kan ni a, Arunachal Pradesh-a Chakma-te chan loh ang hamṭhatna tam tak Mizoram a Chakma-ten in chang," a ti a, Rajiv Nagar leh a chhehvela Kristiante MGNREGS hlawh an cut sak ṭhin nia thu thang awm chungchangah sawifiah turin VC-te a phut.

CYMA President chuan intiamkamna ziah tlan chu bawhchhiat a nih chuan a sawhkhawk a na hle tawh dawn tih Chakma khawtlang hruaitute hi a hrilh a ni.

R Lalngheta chuan boruak ṭha tak neih an duh avangin ngaihtuahna fim tak hmang tlang turin Rajiv Nagar-a VC te leh YCA hruaitute a chah a, "Kan rawn kal avang hian pastor leh missionary-ten harsatna an tawk tur a ni lo. An laka harsatna siam lui an awm a nih chuan a let leh lam a na hle ang. Chakma-te Rajiv Nagar-a a tam zawk in nih avanga a tlem zawk Mizote rahbeh tumna a awm a nih chuan Mizo mipui tam zawk kan pen chhuak ang," a ti.

He hunah hian Mamit Sub-Headquarters YMA huam chhunga Chakma-ten Mizo laka harsatna hrang hrang (pawikhawihna) an thlen ṭhin chu pawi an tih thu leh, tun hnuah hetiang thil a thlen leh chuan darkar 48 chhunga pawikhawihtu zawn chhuah an inhuam thu leh, hma an la lo a nih chuan an chunga engpawh thleng se sawi buai an tum loh thu tarlannaah Rajiv Nagar leh a chhehvela Chakma hruaituten intiamkamna an ziak.