Secondary School Games 2026 Aizawl district an champion

School Education department leh Durex The Birds and Bees Talk ṭangkawp buatsaih Mizoram Secondary School Games vawi 43–na chu nimin khan Mizo High Sikul Field, Zarkawtah khar a ni a; Secondary School Games 2026-ah hian Aizawl district an champion.

Mizoram Secondary School Games-ah hian chi hrang paruk - athletics, football, judo, volleyball, kawikah leh kalchhet hmangin zirlaite an intihsiak a; district 11 aṭangin zirlai 787 leh zirtirtu 66 an tel. Kharna inkhawm hi School Education secretray K Lalthawmmawia'n a hmanpui.

A pumpuiah Aizawl district chuan gold medal 13, silver medal pasarih leh bronze medal pathum lain, a pumpuiah pakhatna an ni a; pahnihna Lunglei district-in gold medal panga, silver medal pakhat leh bronze medal pariat an la. Pathumna Champhai district-in gold leh silver medal pali ve ve leh bronze medal paruk an la a ni.

Mipa best athlete chu gold medal pahnih ve ve latu C Lalruatsanga, Lunglei district leh Malsawmtluanga, Mamit district-te an ni a; hmeichhe best athlete chu Lalruathlui, Aizawl district niin, gold medal pali leh silver medal pakhat a la.