Health Minister-in Surgeon inkhawmpui a hmanpui

Health minister Lalrinpuii chuan November 12, Ningani zan khan Aijal Club-ah '8th Annual Conference of North-East Chapter of the Associations of Surgeons of India (NECASICON) cum 6th Annual Conference of the Association of Surgeons of Mizoram (ASM Conference)' a hawng.

Lalrinpuii chuan, surgeon-te chu nun chhantu an nih piah lamah medicine lama sulsutu pawimawh tak an nih thu a sawi a, "Surgeon hlawhtling ni tur chuan damlote medical history hriat a, enkawl chhunzawm zel dan turah thawktu dangte nena sawiho a ṭul ṭhin avangin ruahmanna siam thiam tak nih a ṭul. In kut hmangin operation nei ṭhin mah ula, in thiamna, in tawnhriat, in tumruhna leh in mihrinna te chu damlote tana damna tak tak thlentu a ni zawk," a ti.

Tunlai khawvel thiamna hmangin surgical practice-ah hmasawnna tam tak a awm mek thu sawiin Lalrinpuii chuan, "Hemi a nih rual hian in hnathawh chhan leh a laimu chu damlo in enkawlte an ni tih hre reng ang che u. Surgeon-te chu education, clinical care leh science hmasawnna kawnga sulsutu pawimawh tak in ni," a ti a; ṭhangtharte tana career chakawm taka siam zel thei turin tunlai hun leh thiamna chhuak thar milin intuaihriam ve zel turin a fuih.

Health Minister chuan, sugeon-te hmingṭhatna leh ropuina vawng nung a, belhchhah bawk tur chuan clinical practice, education leh research lamah danglamna ṭhenkhat hmuh a ṭul nia a hriat thu a sawi a, "Surgeon ṭha chuan mi operate dan a thiam a, surgeon ropui chuan engtikah nge operation neih hun tur a hria a, surgeon chungchuang chuan natna phena mihring chu a theihnghilh ngai lo a ni," a ti a; an hnathawh chhan hre reng turin surgeon kalkhawmte a chah bawk.

Surgeon conference hawnna inkhawmah hian Dr ST Lalruatfela'n kalkhawmte lawmna thu sawiin, NECASI & ASM secretary Dr Lalrinsiama'n report a pe a; mithiamhrang hrangten thu an sawi.