Minister-in World Pharmacy Day leh National Pharmacy Week a hmanpui
Mizoram State Pharmacy Council (MSPC) leh Pharmacy Council of India (PCI) ṭangkawp chuan nimin khan KV Resort, Durtlangah 'World Pharmacy Day' leh 'National Pharmacy Week' an hmang a; minister of state B Lalchhanzova'n hmanpuiin, damdawi lam thiam (pharmacist)-te chu damdawi ei kawnga mipui venghim theitu an nih avangin an thiamna leh theihnate hmang chhuak turin a chah.
B Lalchhanzova chuan, Mizoramah damdawi lam zirna hrang hrang a awm tawh thu leh zirlai eng emaw zatin an zirchhuah tawh thu a sawi a, "Inzirna hi ngainep lo ula, in zirna hi lehkhabu chhiar ringawt a ni lo a, mihring nunna in kutah a awm a, mihring nunna vengtu guardian in ni. Mizote hi damdawi ei huai angreng tak kan ni a, miin an ei leh ngeih nia an sawite ei ve mai ṭhin kan tam hle. Chutiang khawvelah chuan nangni hi mipui venghima, a dik leh him zawk lama kaihruaitu tur in ni a; mipui pawh hian damdawi dawr aṭanga damdawi lei nachang hriatna kawngah te, licence nei ngeia zuar an ni em tih te, pharmacist râwn tur an awm em tih kawngahte kan harhthar a ngai hle," a ti.
Pharmacist-te chu mahni inrawntawkna leh tumruhna nei tura chahin Minister chuan, "Nangmahni inin rintawk phawt chuan mipuiin an ring ang che u. In hmalam hun atan nangmahni in pawimawh ber a, tumruhna nen mahni kea dingchhuak turin hmalam pan zel ang che u," a ti a; mahni inen hniam loa sang taka indah tur leh mahni thil tumah hlawhtlinna chang ngei tura huaisen taka kal zel turin zirlaite a chah bawk.
Pharmacy Council of India vice president Jashubhai H Chaudhari pawhin thu sawiin, pharmacist-te chu mahni hnaah rinawm tur leh inrintawkna nena hnathawk turin a chah a, mipuiten damdawi dik leh him an ei theihna tura zirtir kawngah theihtawp chhuah turin a fuih.
World Pharmacy Day leh National Pharmacy Week puala hun hmannah hian thupui atan 'Swasth Bharat: Combating Antimicrobial Resistance' tih hman a ni. World Pharmacy Day puala inelna hrang hrang - reels insiamsiak, sciatoon, leaflet leh street play-a ti ṭhate hnenah lawmman sem a ni a; Minister hian zirna lama tiṭhate hnenah SL Sailo Proficiency Award a sem bawk a ni.