Prime Minister-in Ropuiliani Tribal Freedom Fighters Museum a hawng

Prime minister Narendra Modi chuan nimin khan viceo conferencing kaltlangin Kelsih khuaa Ropuiliani Tribal Freedom Fighters Museum leh Eklavya Model Residential School (EMRS), Zawlnuam a hawng a, EMRS, Pangzawl South sakna tur lungphùm a phúm nghal. Hemi rual hian chief minister Lalduhoma'n Ropuiliani lim a hawng.

Prime Minister hian Ropuiliani Tribal Freedom Fighter's Museum leh Zawlnuam EMRS a hawn rual hian India ram hmun hrang hranga cheng vbc 3,000 vel hu project thar leh project zawh tawh a hawng a; chu'ng zingah chuan EMRS 37, MPCs under PMJANMAN 100 leh Tribal Research Institute, Arunachal Pradesh te a hawng. EMRS 19, Tribal Multipurpose Marketing Centre 12 leh PMJANMAN leh DAJGUA hnuaia project 42 lungphûm a phûm bawk.

Ropuiliani Tribal Freedom Fighter's Museum chhungah hian museum, open air theatre, traditional hut, heritage walk, Birsa Munda Tribal Pride Garden, cafeteria, quarters leh thil dangte a awm a; Prime Minister-in a hawn pual hian CM Lalduhoma'n a fang kual a ni.

Chief Minister chuan, British awpbeh tumna duh loa bei lêttu lal leh mi huaisen tak tak Mizote'n an neih nual thu sawiin, "Ram leh hnam chhan nana nunna hlantu lalnu Ropuiliani inpekna a chhuanawm tak zet. Mizote hi ram leh hnam chhan nana zâm ngai lo, tlawm duh loa a tawp thlenga ṭang tlat ṭhin kan ni tih kan hriat thar ṭheuh a pawimawh," a ti a; hnam ziarâng, nunphung, chanchin, chîn dan ṭhate ngaihlua chhawm nung zel turin ṭhangtharte a chah.

Hnam tinin mahni pual hnam ziarâng leh tih dan bik an neih thu sawiin Lalduhoma chuan, "Kan hnam ziarâng leh nunphung, keimahnia bet tlatte hi a bo mai loh nan theihtawp kan chhuah tlàn a ngai a, changkannate'n a chîm ral mai loh nan humhim turin kan zavaia ṭanrual a ṭul. Mahni hnam ziarâng leh nunphung hloh khawpa kal a pawi," a ti a; Ropuiliani Tribal Freedom Fighter's Museum chu Mizo hnam ziarâng, nunphung leh chanchin humhalhtu leh hnam huaisen nihna pho lanna hmun a nih dawn thu a sawi.