Aizawlah Zan Special Drive nei leh; Dan bawhchhia mi 74 man an ni

Aizawl Traffic Police chuan November 14, Inrinni zan khan Aizawla hmun hrang hrangah 'Zan Special Drive' an kalpui leh a, dân bawhchhia mi 74 an man. Kumina Zan Special Drive ṭum ruk an neih tawhah mi 371 an man tawh.

Traffic Police Media Cell tarlan danin, Zan Special Drive hi Inrinni zan dar 9 khan an ṭan a, Aizawla hmun hrang hrangah lirthei tlante an endik a, nimin Pathianni zing khawvar dáwn thlengin lirtheite an enfiah a ni.

Aizawl Traffic Police chuan, "Hunpui vuakvêta lirthei chetsualna leh dan bawhchhiatna avanga harsatna thleng thin titlêm turin theihtawp kan chhuah zel dawn... Kan khawpui a him zel thei nan Special Drive nasa zawka kalpui zel a ni ang " an ti a; dan zâwm turin mi tin an ngen.

Traffic police duty awm lohna hmuna dan bawhchhia, mi dang tana harsatna thlente chu Traffic Control Room phone number 9366553559 leh 0389-2313061-ah hriattir theih reng a nih thu an tarlang bawk.

Aizawla Zan Special Drive hi kumin May thla aṭang khan ṭum ruk neih a ni tawh a; May 23, June 25, August 25, September 25, October 10 leh November 14-ah te neih a ni. Zan Special Drive-ah hian lirthei dan bawhchhia mi 371 an man tawh a, chu'ngte chu The Motor Vehicles (Amendment) Act, 2019 hmanga hrem an ni.

Zan Special Drive an kalpui tawhah hian October 10 zan khan dan bawhchhia mi 76 manin, an man tam ber ṭum a ni a; August 25 khan mi 35 manin, an man tlem ber ṭum a ni thung.

NOVEMBER 14-15, 2026-A MAN ZAT

1. Tlân phal loh zawnga tlan - 24

2. Driving license nei lo - 19

3. Helmet khum lo - 12

4. Rûi chunga lirthei khalh - 5

5. Lirthei ri bengchheng - 1

6. Dan bawhchhiatna dang - 13