Sainik School-a lut turin Mizote sáwm

Chhingchhip khuaa Sainik School hotute chuan November 14, Inrinni khan Aizawl Press Club-ah thuthar thehdarhtute an kâwm a; Sainik School chu sikul ṭha a nih avangin fate luhtir tum turin Mizo nu leh pate an sáwm.

Sainik School, Chhingchhip hotute sawi danin, Sainik School-a lut tur hian pawl 6 leh pawl 9-ah ṭan theih a ni a, November 3, 2026 khan online-in application lak theih hun hawn a ni. December 2, 2026 thleng application thehlut theih niin, January 31, 2027-ah entrance exam - All India Sainik Schools Entrance Examination neih tur a ni. Sainik School-a lut tur hian National Testing Agency buatsaih AISSEE paltlang a ngai.

Pawl 6 aṭanga luh tumte tan pawl 5 pass, March 31, 2027-a kum 10-12 inkar, April 1, 2015 leh March 31, 2017 inkara piang nih a ngai a; pawl 9-a lut tur tan pawl 8 zo, kum 13-15 inkar, April 1, 2012 leh March 31, 2014 inkara piang nih a ngai. Mipa leh hmeichhiain an dil thei ve ve a ni.

Sainik School-a zirna senso hi kum khatah zirlai thar tan Rs 2,55,058 leh zir mekte tan Rs 2,29,982 a ni. Hetihrual hian, zirlaite hnenah Mizoram sorkarin scholarship a pek thu leh, scholarship-in tuition, boarding, lodging leh zirnaa mamawh dangte a tel thu Sainik School hotute chuan an sawi.

Sainik School hotute sawi danin, scholarship hi schedule tribe/caste, nu leh pa thla khata sum lak luh Rs 50,000 chin hnuai lam tan full scholarship (zirna senso zawng zawng) hmuh theih a ni a, thla khata Rs 5,001 - 1,00,000 inkar la lut tan half scholarship hmuh theih a ni.

Sainik School-a admission dil duh tan https://exams.nta.nic.in/sainik-school-society/ leh https://sschhingchhip.mizoram.gov.in/ ah te online-in dil theih a ni.