KHAWTHLIR

KṬP-in thisen pe

KṬP, Airfield Vengthar Bial chuan nimin khan Synod Hospital tan thisen unit 23 an pe a, petute mipa 22 leh hmeichhia pakhat an ni.

India President a rawn zin dawn

President Droupadi Murmu chuan November 28-30, 2026 khian Mizoram a rawn tlawh dawn. President rawn zin tur chungchangah hian nimin khan chief secretary Khilli Ram Meena leh GAD secretary Sudhir Kumar te hoin sorkar hotute Secretariat conference hall-ah an ṭhukhawm a; President dawnsawn dan tur leh department hrang hrangte mawhphurhna turte sawiho a ni.

Chapchar Kût hman dan tur rêl

Chief minister Lalduhoma kaihhruaiin nimin khan CMO conference hall-ah Chapchar Kût Organising Committee an ṭhukhawm a, nakkuma Chapchar Kût hman dan tur tlangpui an sawiho. Organising Committee-ah leh a hnuaia committee pêng hrang hranga member siamṭhat leh belh ngaite sawiho a ni bawk.

Ar notê sem

Adviser to CM TBC Lalvenchhunga chuan nimin khan a bial chhunga Tanhrilah ar vulha eizawnna bul ṭan duh chhungkaw 10 hnenah ar notê 100 leh ar chaw ip hnih ṭheuh bakah, tui pekna a sem. TBC Lalvenchhunga chuan, tih tak zeta beitute chu ṭanpuina awm thei ang ang a ngaihtuahsak zel dawn thu a sawi.

Health camp

Aizawl West District Chief Medical Office hnuaia Aizawl veng hrang hrangah health camp neih mek a ni a, nimin khan Chawlhhmun basketball court-ah neih niin, mi 72 hriselna dinhmun endik a ni. Health camp hi Aizawla veng 11-ah neih a ni tawh a, veng thlan bikah neih chhunzawm zel tura ruahman a ni.