
Khualzin pung zelah hmeichhiate himna ngaih pawimawh a ṭul - Lalrinpuii
Social Welfare, Women & Child Development minister Lalrinpuii chuan, Mizoramah khualzin pung zelin hlâwkna a thlen rualin, hmeichhiate himna ngaih pawimawh a ṭul thu a sawi a; nawhchizawrhna hmun (brothel) siamtute leh mahni in leh hmunhmate chutiang atana hmantirtu chu na taka hrem theih an nih thu a sawi.
Lalrinpuii hian nimin khan Planning conference hall-ah Mizoram State Commission for Women (MSCW) leh National Commission for Women (NCW) buatsaih 'Consultation on the Mizoram Prevention of Immoral Traffic Rules, 1996' a hmanpui a ni.
SWWCD Minister chuan, hmeichhiate himna leh an dikna humhalh dan awmte ṭha taka hman a pawimawh thu a sawi a, "Mizoram hi khualzin tlawh tamna hmun a lo nih chhoh zel avangin kum kal ta chhung khan khualzin nuai 5 chuangin Mizoram an tlawh a, kuminah pawh khualzin an pung nasa. Khualzin pung zel hian ram tana hlâwkna a thlen theih rualin, Mizo hmeichhiate himna ngaih pawimawh a ṭul a ni," a ti.
Immoral Traffic (Prevention) Act-in nawhchizawrhna leh a kaihhnawih thil tih a khap thu sawiin Lalrinpuii chuan, "Chutiang thil tihpuitu leh hmeichhia zawnsaktute pawh dan anga hrem theih an ni a, nawhchizawrhna hmun (brothel) siamtute leh mahni in leh hmunhmate chutiang atana hmantirtu chu na taka hrem theih an ni," a ti a; dan kengkawhtute'n zirchianna zau zawk an neih a, Mizorama hotel leh homestay kalphungte pawh enfiah a ṭul thu a sawi.
Inrawnkhawmnaah hian zirhonaah hian sorkar hotu hrang hrang an tel a; MSCW chairperson C Zodinpuii'n a kaihruai a, Women and Child Development director Zoramthangi Chhangte pawhin thu a sawi a ni.