PM Ekta Mall sak mek thlirho

Ministry of Commerce & Industry hnuaia Department for Promotion of Industry and Internal Trade (DPIIT) director Mohammed Isharar Ali chuan Mizoram a rawn tlawh a, nimin khan chief secretary Khili Ram Meena hoin Chawnpui, Aizawla PM Ekta Mall sak mek dinhmun an thlirho.

PM Ekta Mall project hi Prime Minister programme a nih angin DPIIT chuan a hun taka zo thei turin state tin an nawr mek a; chumi atan chuan DPIIT hotute'n state hrang hrang an tlawh a ni.

PM Ekta Mall hmunhma tur la zawng mek state ṭhenkhat an awm laiin, Mizoram chu ti ṭha ber zingah tel pha lo mah se, hmalak tawh dan Ministry hotute'n an hmuh chinah an lungawi thawkhat a, hmalakna awm tawhte ṭhain an hria niin sorkar thuchhuah chuan a tarlang.

Mizoram Tourism Development Authority chuan Chief Secretary-in a ṭul ang zela puihna a pek ṭhin avangin lawmthu an sawi a; theihtawp chhuahin timeline (December 2027)-a zo hman turin hma an lak mek thu an tarlang a ni.