Vairengte tlangval nupui tur man hlan zo lirthei chesualah a thi

Lalramhluna (30) s/o H Lalṭanpuia, Vairengte chu nimin khan a nupui tur man hlanna, Kawnpuia neiha a tel, Vairengte pana an haw leh lam chu Bilkhawthlir leh Vairengte inkarah maxicab nen an insu a, a hliam tuar loin a thi.

Vairengte Police aṭanga thu dawn danin, Lalramhluna hi a nupui turte khua Kawnpuiah November 16, Thawhṭanni khan an kal a, zanah man inhlan a ni. Nimin khan Vairengte an pan a, a ṭhianpain scooter-in a phur a, naktuka innei tur an nih avangin a nupui turte pawhin lirthei dangin Vairengte an pan ve bawk.

Vairengte ram chin thlen hma deuhah truck an tlan pelh dawn laiin maxicab nen an insû a, Lalramhluna chu nikhaw hre loin a awm nghal a, damdawi-in panpui a nih hnuah a hliam tuar loin a thi. A ṭhianpa erawh chu a hliam na lo thung.

Vairengte Police chuan thubuai ziak lutin, maxicab khalhtu an man a ni.