
KHAWTHLIR
Mei zu mi 2 man
Aizawl District Anti Tobacco Squad chuan nimin khan MINECO huam chhunga pisa hrang hrang 11 tlawhin, phal lohna hmuna mei zu an awm leh awm loh an endik a; vaihlo zûk leh hmuam khapna dan, Cigarettes and Other Tobacco Products Act bawhchhia mi pahnih manin, pawisa an chawitir.
MJA member thar
MJA General Headquarters chuan nimin khan MJA member nih dil zinga mi pathum an pawm. MJA member atana pawmte chu - AIR (Akashvani) Aizawl correspondent C Lalthansangi, The Frontier Despatch managing editor PC Chuaudinsanga leh Hindustan Times correspondent Lalsangzuala Hmar te an ni.
Heroin man
Saitual police-te chuan nimin zing khan Keifang Kualmawiah Duster car AS-01 BD-7500 aṭangin heroin gram 280 an man a; lirthei khalhtu T Lalminlun Haokip (21), Kamkeilon, Churachandpur, Manipur an man nghal bawk. Saitual Police Station-ah thubuai ziah luh a ni.
MJA-in lawmpui
November 14, 2026-a Namaste Award 2026 dawngtu Serchhip bawrhsap Paul L Khuma chu MJA, Serchhip District chuan November 16, Thawhṭanni tlai khan Serchhip Tourist Lodge-ah lawmpuina an hlan a, zanriah an buatsaihsak. Lawmpuina inkhawm hi Serchhip MJA vice president Lalremruata Ralte-in a kaihruai a, president Kapliana Pachuau-in thu sawiin, an DC chu an chhuan thu leh an lawmpui tak zet thu a sawi.
Báng turin ngen
Mizo Students’ Union (MSU) chuan Aizawla college SU hruaitute nen nimin khan Mizoram Public Service Commission (MPSC) chungchanga hmalak zel dan tur an ngaihtuah a; MPSC-in sorkar hnathawk tur a laknaa tihsual a neih chungchangah MPSC Chairman chu a mawhphurhnaah laa báng turin an ngen nawn. November 19, 2026 thlenga a bâng lo a nih chuan, a bàn ngei theih nan na zawka nawr an rêl a ni.