VB-GRAMG-ah July 1, 2026 hmain Mizoram sorkarin a peih - RDA Dept

Rural Development and Administration depart-ment chuan thuchhuah siamin, Viksit Bharat-Gurantee for Rozgar and Ajeevika Mission - Gramin (VB-GRAMG) hnuaia inhlawhfate hlawh pek chungchang an sawifiah a; state matching share tur cheng vbc 67.96 chu VB-GRAMG hman ṭan hun, July 1, 2026 hmain Mizoram sorkarin a peih tawh thu an tarlang.

RDA department chuan, June 9, 2026 khan Union Rural Development minister Shivraj Singh Chouhan hoin state RD minister-te'n video conferencing an neih thu tarlangin, "Union Minister hian July 1, 2026-ah ram pumah VB-GRAMG hman a nih dawn avangin, Mizoram, Jharkhand, Karnataka leh Telengana te chu VB-GRAMG atan state budget peih thuai turin a sawi ngei a, hetianga a sawi lai hian VB-GRAMG hi la hman a ni lo a, MGNREGA la hman a ni," an ti a, July 1, 2026 hma ngeia matching share nei turin Finance department nen hma an lak thu an sawi.

Ministry of RD-in June 10, 2026 khan Mizoram tan VB-GRAMG-ah interim budget cheng vbc 611.65 a pek thu sawiin RDA department chuan, "June 17, 2026-ah Mizoram Finance department chuan 10% state matching share cheng vbc 67.96 pawh RDA department-ah min rawn pe ve nghal a, July 1, 2026 hmain Mizoram sorkar chu state budget allocation vbc 67.96 nen VB-GRAMG atan a inpeih at tawh zawk a ni," an ti.

RDA department chuan, VB-GRAMG hman a ni dawn tih hriat a nih veleh nasa takin Mizoram sorkar a inpuahchah nghal tih sawiin, "India rama state VB-GRAMG scheme notification leh 60-days pause notification chhuah hmasa ber a ni," an ti a; Unemployment Allowance Rules, Delay Compensation Rules, Grievance Redessal Rules, State Council Rules leh VB-GRAMG Fund Rules te pawh state dangte hmakhalhin chhuah vek a nih tawh thu an tarlang.

Rural Development department tarlan danin, VB-GRAMG hnuaia inhlawhna sum mipui hnena a luh dan chu a hma aiin a kual deuh tawh a, Fund Transfer Order (FTO) sign a nih hnuah State IFMIS-ah bill siam phawt a ni. Chumi hnuah Cyber Treasury-ah bill thehluh a ni a, chu chu RD Ministry-a PFMS Division-in a pawmpui a ngai a, a pawmpui hnuah RBI PFMS-in u-Kuber aṭangin an khawih ve leh bawk. Chumi hnuah state IFMIS-ah lut lehin, mipui account-ah a lut thei ta ṭhin a ni.

RD depatrment chuan, social media-ah thu dik tluantling lo thehdarh a nih ṭhin thu sawiin, "Thu belhchian dâwl lo, mipui rilru hruai kawi thei thil chhuah fo hi RDA chuan ṭha a ti lo hle. Mipuite chî-âi lo tur leh thlaphâng lo turin a chah a, hriat belh duh nei chuan VB-GRAMG State Cell-ah zawhfiah theih reng a ni," an ti.