
Zirlaite tan lem inziahsiak buatsaih

North Eastern Electric Power Corporation Limited (NEEPCO) chuan nimin khan Vaivakawn Cultural Centre-cum-Auditorium-ah Painting Competition on Energy Conservation an buatsaih a, zirlai 100 telin, School Education director Angela Zothanpuii'n a hmanpui.
Lemziaka inelna hi National Campaign on Energy Conservation Bureau of Energy Efficiency (BEE) bultuma NEEPCO-in an buatsaih a ni a, energy renchemna kawnga hmalakna a ni. Mizorama district 11-ah intihsiak buatsaih hmasak niin, sikul 102 aṭangin zirlai 2,448 an tel a, chu'ng zinga a ṭha thlan chhuah zirlai 100-te chu nimin khan state level inelnaah an tel leh a ni.
Painting Competition-a pakhatnain Rs 50,000, pahnihnain Rs 30,000 leh pathumnain Rs 15,000 an dawng a; group pahniha mi 10 ve ve hnenah consolation prize Rs 7,500 ṭheuh hlan a ni bawk. Intihsiaka pakhatna aṭanga pathumna te hi December 11, 2026-a New Delhi-a national level Painting Competition-ah Mizoram aiawhin an tel ang.
Intihsiak hi Angela Zothan-puii bakah, School Education deputy director Zoramchhani, PIB Media & Communication officer Dr Rajeev Lourembam leh NEEPCO general manager N Khogendra Meitei te pawhin an hmanpui a ni.