Dima Hasao zirlaite'n Mizoram tlawh

Assam Rifles leh Haflong, Assam-a tlawmngai pawl 'A Ray of Hope Society' te chuan Dima Hasao, Assam-a zirlaite tana Inter-State Educational Tour buatsaihin, Mizoram an rawn tlawh mek a; zirlaite hian nimin khan Governor Gen. Dr Vijay Kumar Singh nen Lok Bhavan-ah hun an hmangho.

Larsap chuan, Dima Hasao aṭanga zirlai rawn zinte chu Mizoramah a lo lawm thu sawiin, an chàm chhungin Mizo hnam ziaráng, nunphung leh ṭawng te a tam thei ang ber zir tur leh, Mizote chìn dan ṭha leh entawn tlakte hàwna nunpui tum turin a fuih.

Gen. VK Singh chuan, zirlaite chu an nuam tihna hmunah chauh awm lo a, hna zawnga hmun danga chhuah hreh lo turin a fuih a, "Zirna kan ngai pawimawh tur a ni a, thil thar kan zir zel tur a ni," a ti a; tribal zirlaite chawi kânna tura Ray of Hope Society hmalakna chhuanawm a tih thu leh, educational tour an neih theihna tura hma latu Assam Rifles fakawm a tih thu a sawi.

Inkawmhonaah hian Assam Rifles 23 Sector commander Brig. Puspendar Sorayan leh officer dang te, A Ray of Hope hotu Mithun Sarkar ten an telpui a ni.