Police-in heroin leh meth vangin Oct. 2026-ah thubuai 18 ziak lut

Mizoram Police chuan October 2026 chhung khan Rs 2,20,27,550 hù heroin leh methamphetamine manin, thubuai 18 an ziak lut a; ruihhlo do beihpui an thlaknaah theihtawp chhuahpui turin mi tin an ngen.

Mizoram Police tarlan danin, kumin October thla chhung khan heroin kg 2.98 an man a, Rs 89,40,000 hûa chhut a ni a, heroin kaihhnawihah hian pawisa fai Rs 3,99,550 an man tel. Thubuai 15 ziak lutin, mi 23 an man a, mi an mante chu India mi 21 leh ram dang mi pahnih an ni.

Police-te hian October thla chhung vêkin methamphetamine kg 9.76 manin, Rs 1,26,88,000 hùin an chhût a; mi panga - India mi pali leh foreigner pakhat manin, thubuai pathum an zak lut.

October 2026 chhunga Mizoram Police-in heroin leh meth an man zawng zawng hlut záwng chu Rs 2,20,27,550 a ni a; ruihhlo chi hnih man kaihhnawihah thubuai 18 an ziak lut a, mi 28 manin, India mi 25 leh foreigner pathum an ni.

Mizoram Police chuan, "Thla khat chhung leka heti zat ruihhlo man a ni hian ruihhlo beihnaa police-te hmalakna leh thawhrimna chiang taka a tarlan rualin, nasa lehzuala ruihhlo donaah hmalak a ṭulzia a tarlang chiang hle," an ti.

Sorkar, VC, YMA leh pawl hrang hrang ṭanghoin ruihhlo do beihpui an thlaknaah theihtawp chhuahpui tur leh, ruihhlo tawlhruk hriate chu thuneitute hnenah hriattir zel turin Mizoram Police chuan mipui an ngen a ni.