Fa lâk chungchang zirhona buatsaih

State Adoption Resource Agency (SARA) leh Central Adoption Resource Authority (CARA) chuan National Adoption Awareness Monthpualin nimin khan IPR Lianchhiari Rûnah fa lâk leh a kaihhnawih dante zirhona, 'Adoption Awareness Workshop' an buatsaih a, Gauhati High Court Aizawl Bench registrar Dr HTC Lalrinchhana'n a hmanpui.

Dr HTC Lalrinchhana chuan, fa lak leh a kaihhnawih dan leh hraite hriat chian chu a kaihnnawih department-te mawhphurhna chauh ni loin, mi tinin an hriat tur a nih thu a sawi a, "Adoption hi naupangte dikna leh chanvo humhimna leh an hmakhua venhimna a nih bakah, naupangte chhungkaw him leh ṭhaa an seilen theihna tura hmanraw pawimawh a ni," a ti.

Dan kalha fa lak chu naupangte dikna chanvo bawhchhiatna a nih thu sawiin, "Dinhmun him loa dintir theitu a ni," a ti a; dan hnuaiah chauh miin fa an lak theih nan mi tin ṭanrual a ṭul thu a sawi.

Zirhonaah hian Women and Child Development director Zoramthangi Chhangte kaihhruaiin Adoption Month pual thutiam - dan ang taka fa la tur leh chumi atana mi dangte zirtir tura intiamna thu sawi rual a ni a; CARA deputy director Vinita Jha-i'n dan anga fa lak theih dan a sawifiah.

Ministry of Women & Child Development hnuaia CARA chuan kum 2020 aṭangin November thla hi National Adoption Awareness Month atan a ruat a, thupui neiin ram pumah November thla chhungin fa lak chungchang inzirtirna buatsaih ṭhin niin, kumina thupui chu 'Legal adoption: Safe childhood, Secure future, Say no to illegal adoption' tih a ni.