

Minister-in kawng siam tur a enfiah
Minister of state B Lalchhanzova chuan nimin zing khan a bial Aizawl East-II chhunga Armed Veng South kawngpui thawm ṭhat dan tur a en a; bialtu corporator Christina Roluahpuii Sailo, PWD leh Police hotute'n an ṭawiawm.
B Lalchhanzova chuan, a bial chhunga kawng tam zawk chu chhuk chho tak tak an nih thu a sawi a, "Chho ulh zual laite a theih ang anga siamrem a ṭul a, Modern English HSS bul leh Chhinga Vengah te hmalak a ni tawh. Ruahsur vangin hun eng emaw chen a khailak a, tunah Armed Veng South-ah kawng siamrem hna thawh leh mek a ni a, zawh thuai a nih theihna atan theihtawp kan chhuah zel ang," a ti.
Kawng ulh zual laite tihzàl a nih hnuah Saron Veng leh Chite Veng inkar kawng bakah, Falkland Veng thlengin bitumen concrete-a siam a ni dawn thu sawiin B Lalchhanzova chuan, "Chak zawka thawh a nih theih nan veng mipui ṭawiawmna ka ngen," a ti a; chak zawka thawh a nih theih nan kawng dan a ngaih ṭhin avangin lirtheia veivaha harsatna a awm pawhin hrethiam turin mipui a ngen.